امل صبحي تكتب السيرة اطول من العمر

.

الحياة قصيرة جدا…لكننا لا نستوعب الا بعد فوات الاوان وعلي فكرة برضة دى مرة واحدة مش بروفوا …ودى دنيا من الدونية يعني لا تستحق لان السيرة اطول من العمر لو
عايز الناس تجيب سيرتك دايما بالخير..
عايز توصلك دعوات من ناس متعرفكش من كتر ما اتعملّها شير..
كفاية انانية وافكار شريرة علشان توصل لكل اللي في نفسك..
والله كله عنده في كتاب مش حتوصل لحاجة غير اللي مكتوبلك..
متمسك كدة ليه بمتاع الدنيا..
انت ناسي ان لسة في حياه تانية..
ممكن في لحظه كله يروح..
وممكن ربنا يسيبهولك وفي لحظه انت اللي تروح..
مش حقلك ابني جامع او انشر علم تفيد به الناس..
في حاجات في الدنيا سهلة مش محتاجة غير شوية احساس….احساس يا بشر اولها انك لم تعمل حاجة علي طول نفذ نظرية تبادل الادوار..علشان
تخلّي الكل يفتكرك بالخير في حياتك..
وتدّمع لما تسمع اسمك وتدعيلك بعد مماتك..
بس انت طوّل بالك معايا شويه….الوصفة سهلة او ى
واقرى الليسته اللي جايه..

صحبك مكتئب كلمه هون شوية عليه..
اومال انت فاكر انتم صحاب اصلا ليه….علشان الوقت الحلو بس…لا
اسمعله انكشه ضحّكه نزّله وادّيه مكان بيحبه ومتسبهوش..
مش تعمل موبايلك سايلانت ومتعبرهوش..
ولو انتم بنات يا سلام لو جبتيلها هدية.. .ولو وردة .بااكت شكولاتة
وروحيلها البيت وارغي معاها شوية..
وفي الاخر اديها هاج وقوليلها مليش غيرك في الدنيا ديه..
اصلهم كلهم بيموتوا في الدلع والحنية….كل البنات والستات والله وعلي فكرة الحضن دة امان وعلميا لة فوائد كتير
كلّم حد اسأل عليه من غير سبب..
وبلاش تنهي المكالمة ببقلك ايه وترزع الطلب..
خاليك واحد جدع يجرى لاليعرفه واللي ميعرفوش..
بلاش تبقى خارج مع صاحبك بعربيتك ومتوصلوش…او تسيبة وتتحجج مثلا علشان حاجة هبلة اصلها مش حاتفرق لكن حاتفرق معاة

صاحبتك اتجوزت وسافرت وسايبة مامتها هنا لوحدها..
خاليكي جادعة متخافيش مش حقلك روحي باتي عندها..
بس يا سلام لو مسج كل يومين..
وتليفون كل اسبوعين..
وزيارة كل شهرين..
متخيله صحبتك ومامتها حيبقوا اد ايه فرحانين.. .علي فكرة انتي كمان حاتنبسطي اصل العطاء متعة بدون انتظار المقابل

عيد الام مش بس مامتك وحماتك وخالتك وعمتك..
عيد الام يعني مرات خال عمة ابو باباك او مامتك..
ناس مش مستنيه انت اللي تعيّد عليهم..
بس حيفرق تليفونك معاهم اوى ولو حتى مش انت اللي ليهم..

جرب مرة تجيب علبتين بسكوت وتروح تزور ملجأ..
وفوّت اسبوع كدة وروح نفس الملجأ..
حتلاقي ملايكة بتجري عليك..
وحتى لو جاى وايدك فاضية حيتشعلقوا فيك..
ومش حيسبوك تروّح اصلهم اتعلقوا بيك..
والله مش قصة ثواب بس ده حيبقى متعة ليك..
وانت اللي حتتعلق بيهم..
وحتحس ان روحك فيهم..
ويوم ما حتعيا وتلقيهم جاينلك..
مجيتهم دي بالدنيا مهما كان الناس عملينلك…ودة الي بيحصل معايا والله اول ما اتعب بلاقي مش القريبن مني لا دة في ملايكة ربنا بيسخرها

وانت نازل الصبح صبّح على البواب ومراته..
وبواب العمارة اللي جنبك والعب مع اولاده..
قول لسايس الجراج العربية بتلمع تسلم ايدك..
حتلاقيه جايلك مخصوص يعيّد عليك يوم عيدك…او لو طلبت منة حاجة بيعملها بحب
وقّف عربيتك وعدّي من قدامك راجل او ست الشارع..
متقطعش عليهم علشان يتقال عليك سواء بارع..
افرد وشك وابتسم في وش الى بيسعدوك في البيت حسسهم انهم جزء من البيت مش انك ممكن تطردهم في اى وقت والعامل والبايع..
بلاش التناكة دي والوش المايع..
قول من فضلك وحضرتك ولو سمحت..
قول شكرا وحتلاقى نفسك بعدها ارتحت..
قول انا اسف حقك علية متزعلش.. لاى حد تحس انك زعلنة تجاهلتة
ولو تقدر تكتكم غيظك والغضب عليك مايبنش.

اسمع دايما حكايات مامتك وباباك…الي عايش منهم .
اضحك معاهم عليها حتى لو دي حاجه مزهقاك..
لو نرفزوك امسك نفسك واوعى تتعصب عليهم..
ولو اتعصبت مرة ارجع حِب على اديهم وبوس رجليهم..
قومي اعمليلهم كيكه من اللي باباكي بيحبها..
ماتقوليش لمامتك وخليه هو يدقها الاول ويقلها..
ولما يرجع من بره جايبلك الشوكولاته اللي بتحبيها..
ماتقوليلوش انا عاملة دايت وجانبك ترميها..
قوليلوا ميرسي ربنا يخليك لية..
ومايحرمنيش من حنيتك علية..
انت بجد احلى اب في الدنيا دية….لان بعد كدة حاتندم انك ضيعت اى دقيقة بعيد عنهم او حتي دقيقة زعلت حد فيهم لانك حاتكتشف .ان الدنيا صحراء من غيرهم

من الاخر اعمل اى حاجة ترسم بيها ابتسامة على وش اللي قدامك..
اعمل دة من قلبك وحتلاقي وجعك انت راح وحتحلوّ ايامك….ولما تحلو ايامك لن تغير ولن تحقد ولن تحسد .قولوا للى حواليكم انكم بتحبوهم اوى ان حياتكم من غيرهم لا تساوى ..قبل فوات الاون ..الحب والعطاء اكسير الحياة .كن هين لين وكفاية خيانة وحقد ولوع السيرة اطول من العمر ..والحياة مرة واحدة مش بروفاa.s

عن سمية المصري

اترك تعليقاً

لن يتم نشر عنوان بريدك الإلكتروني.